«ПСЖ» Мессининг маоши ҳақидаги миш - мишларни рад этди
«ПСЖ» клуби спорт директори Леонардо аргентиналик ҳужумчи Лионел Мессининг маоши ҳақида оммавий ахборот воситаларида эълон қилинаётган маълумотлар нотўғри эканини маълум қилди.
«Бу рақамлар ҳақиқатга тўғри келмайди. Одатда футболчилар маоши ҳақидаги маълумотлар сир сақланади. Лекин шуни ишонч билан айтишим мумкинки, Месси маоши бўйича ОАВ да тарқалаётган маълумотлар хато», — деди Леонардо.
18 сентябрь, шанба куни L'Equipe нашри Месси «ПСЖ»да уч йил ичида тахминан 110 миллион евро маош олиши мумкинлиги ҳақидаги маълумотларни эълон қилди. 34 ёшли футболчининг маоши биринчи йилда солиқлардан кейин 30 миллион еврони ташкил қилади. Шу билан бирга, у криптовалютада 1 миллион евро, иккинчи ва учинчи йил учун эса йилига қарийб 10 миллион евро миқдорида пул олиши керак.
Эслатиб ўтамиз, Лионел Месси 2021 йил 10 августда «ПСЖ» билан икки йиллик шартнома имзолади. Ушбу келишув яна бир йилга узайтирилиши мумкин. Аргентиналик футболчи Испаниянинг «Барселона» клубини шартнома муддати тугаши натижасида тарк этди.
