15,3 миллиард сўмлик ноқонуний олиб кирилган парфюмерия воситалари аниқланди
Сўнгги пайтда транзит тарзда олиб ўтилаётган товарларни юртимиз ҳудудида тушириб қолдириб, ички бозорга ноқонуний равишда йўналтиришга уриниш ҳолатлар тез-тез учрамоқда.
Яқинда яна бир ана шундай ҳолат аниқланди. Бу ҳақда Давлат божхона қўмитаси матбуот хизмати раҳбари Нурбек Саломов Zamon.uz'га маълум қилди.
Хабарга кўра, Бирлашган Араб Амирликларидан юк автотранспорт воситасида келтирилаётган, ҳужжатларга кўра 48 минг 341 АҚШ доллари қийматидаги салкам 26 тонна оғирликдаги парфюмерия воситалари дастлаб Бухоро вилояти божхона бошқармаси “Олот” чегара-божхона пости орқали республикамиз ҳудудига кирган.
Транзит тарзида ҳаракатланаёган мазкур юклар қўшни давлатга чиқиши учун Фарғона вилоятидаги “Ўзбекистон” чегара божхона постига йўналтирилган.
Мазкур юк автотранспорт воситаси Тошкент вилоятининг Ангрен шаҳри ҳудудида божхона ходимлари томонидан кўздан кечирилганда, парфюмерия воситаларининг катта қисми йўлда тушириб қолдирилгани маълум бўлди.
Олиб борилган тезкор-қидирув тадбирлари натижасида божхона расмийлаштирувини тасдиқловчи ҳужжатлари бўлмаган қиймати салкам 15,3 миллиард сўмлик 95 минг 577 дона парфюмерия воситалари пойтахтимизнинг Сергели туманида ноқонуний равишда тушириб қолдирилгани аниқланди.
Ушбу товарларнинг эгаси аниқланиб, унга нисбатан тегишли процессуал ҳужжатлар расмийлаштирилди. Айни пайтда ҳолат юзасидан божхона органлари томонидан терговга қадар текширув ишлари олиб борилмоқда.
Бундан аввал Давлат божхона қўмитаси томонидан cифати кафолатланмаган дори воситалари муомалага киришининг олди олингани ҳақида хабар берилганди.
Муножат Валиева
