Қамоқхонада очлик эълон қилган Саакашвилининг саломатлиги жиддий ёмонлашгани маълум бўлди
Михаил Саакашвилининг аҳволи оғирлашган. Бу ҳақда унинг адвокати Бека Басилая маълум қилди.
Адвокат буни собиқ президент эълон қилган очлик билан боғлаган. “Михаил Саакашвилининг очлиги оғир босқичга ўтди. Биз бунинг натижасини кўряпмиз. Собиқ президентнинг оёқлари шишиб кетган ва шу сабаб ҳаракатланишда қийналмоқда. У гапираётганда очликнинг таъсири яққол кўриняпти. Шундай бўлса-да, Саакашвили кучли, аммо очлик унинг кейинги аҳволини янада оғирлаштиради”, – деган Басилая журналистларга.
Шунингдек, у Саакашвилининг шахсий врачи Николоз Кипшидзе ҳали ҳам собиқ президент олдига кира олмаганини маълум қилди. Саакашвилининг ўзи тарафдорларига мурожаат йўллаган ва 14 октябрь куни норозилик акцияларига чиқишга чақирган.
Маълумот ўрнида: Саакашвили 1 октябрь куни қамоққа олинган. У Грузияга 8 йиллик танаффусдан сўнг қайтиб келди. Собиқ президент 2004-2013 йилларда мамлакатни бошқарган. Шундан кейин у Украина фуқаролигини қабул қилган ва бир қанча лавозимларда ишлаган.
Аввалроқ Грузия бош вазири Саакашвили нима учун қайтганини айтганди. Шунингдек, Европа Иттифоқи Грузияни Саакашвили масаласида вазмин бўлишга чақирганди.
