Суд сохта “давлат хизматчи”си ишига қонуний баҳо берди
Кейинги пайтда ўзини турли ҳукумат идоралари, хусусан, Ўзбекистон Республикаси Президенти Администрацияси, Вазирлар Маҳкамаси, ҳокимият ва турли давлат идоралари ходими сифатида таништириш, уларга тегишли гувоҳномаларни қалбакилаштириш орқали сохта мансабдор шахс ниқоби остида ғаразли ниятларини амалга ошираётган шахслар сони кўпайиб бормоқда.
Ушбу сохта мансабдорлар ҳатти-ҳаракати жамиятдаги фуқаролар ҳақ-ҳуқуқларининг поймол бўлиши, фирибгарлар ўлжасига айланиб қолиши, давлат ҳокимияти органлари, ҳуқуқни муҳофаза қилувчи ташкилотларга нисбатан ишончни йўқолишига сабаб бўлади.
Яқинда 1966 йил Тошкент шаҳри Олмазор туманида туғилган, вақтинча ишсиз И.И. қўлган олинди. Тадбир давомида ундан Ўзбекистон Республикаси Президенти Администрацияси ходимига тегишли қалбаки гувоҳнома ашёвий далил сифатида олиб қўйилди.
Мазкур иш юзасидан тўпланган ҳужжатлар тергов бўлимига тақдим этилиб Ўзбекистон Республикаси Жиноят кодексининг 228 моддаси 1 қисми, яъни ҳужжатлар, штамплар, муҳрлар, бланклар тайёрлаш, уларни қалбакилаштириш, сотиш ёки улардан фойдаланиш аломати билан жиноят иши қўзғатилди.
Жиноят иши бўйича Миробод судида мазкур воқеа атрофлича ўрганилди, унинг сабабчисига қонунуй баҳо берилди.
Суд жиноий иш ҳужжатларини кўриб, ҳукм чиқарди. Ўзбекистон Республикаси Жиноят кодексининг 228 моддаси 1 қисмида назарда тутилган жиноятни содир этган фуқаро И.И айбдор деб топилиб, ойлик иш хақининг 15 фоизини давлат даромади ҳисобига ушлаб қолиш, 2 йил муддатга ахлоқ тузатиш ишлари жазоси тайинланди.
Муножат Валиева
