Ўтган ҳафтада иш бошлаган Шри-Ланка Бош вазири Ранил Викрамасингхе халққа мурожаат қилиб, оғир иқтисодий вазиятга ишора қилди.

"Бизда бензин тугаб қолди. Ҳозирда бор-йўғи бир кунлик захира бор. Кейинги бир неча ой бизнинг ҳаётимиздаги энг қийин ой бўлади. Биз қандайдир қурбонликлар қилишимиз ва қийинчиликларга тайёр бўлишимиз керак"-дея бош вазирнинг сўзларидан иқтибос келтирган маҳаллий нашрлар.

У шунингдек, мурожаат давомида инфляция қисқа муддатда кўтарилиши мумкинлигидан огоҳлантирди.

Бундан ташқари, бош вазир мамлакатда электр таъминотидаги узилишларнинг кунлик муддати оширилиши ва кунига 15 соатгача бўлиши мумкинлигини айтди.

Айрим кузатувчиларнинг фикрича, Шри-Ланка мамлакат Буюк Британиядан мустақилликка эришган 1948 йилдан бери энг жиддий инқирозни бошидан кечирмоқда.