Пойтахтимиздаги Халқаро шахмат академиясида роппа-роса бир ҳафта давом этган шахмат бўйича ўзбекистонлик биринчи гроссмейстер Георгий Агзамов хотирасига бағишлаб ўтказилган 14-анъанавий халқаро турнир якунига етди.

Бугун мусобақанинг сўнгги 9-тур ўйинлари ўтказилиб, ғолиб ва совриндорлар аниқланди. Якуний тур олдидан ғолибликка асосий даъвогар сифатида икки шахматчи қаралаётган эди. Булар – арманистонлик Шант Саргисян ҳамда ҳамюртимиз Нодирбек Ёқуббоев.

9-турда арманистонлик шахматчи қора доналарда ўйнашига қарамай ҳамюртимиз Жаҳонгир Воҳидов билан муросага эришди. Натижада у ўз очколари сонини 7 тага етказиб олди.

Нодирбек Ёқуббоев эса Озарбайжон вакили Мисратдин Искандаров билан куч синашди. Искандаров ФИДE рейтингидаги ўрни, қолаверса, турнирда қайд этаётган натижалари борасида Нодирбекдан орқада қолаётганди. Шу боис мазкур ўйинда қайд этиладиган дуранг натижа ҳам Ёқуббоевни халқаро турнир ғолибига айлантириши кутилаётган эди. Боз устига, ҳамюртимизнинг оқ доналарда ҳаракат қилиши ҳам унга сезиларли устунлик берарди. Аммо босим кучлилик қилдими ёки бошқа сабабми, Нодирбек кутилмаганда рақибига ютқазиб қўйди. Натижада у халқаро турнирда 5-ўринни қайд этди.

9-турда тажрибали Марат Жумаевни қора доналарда мағлуб этган ёш, умидли шахматчимиз Нодирбек Абдусатторов эса ўз очколари сонини 6,5 тага етказган ҳолда 2-ўринни қўлга киритди. Кучли учликка худди шунча очко жамғарган тожикистонлик халқаро мастер Муҳаммад Хусенходжаев якун ясаб берди.

Мусобақа якунида ғолиб ва совриндорларни тақдирлаш маросими бўлиб ўтди. Унда Ўзбекистон Республикаси Бош вазирининг ўринбосари – туризм ва спорт вазири, Ўзбекистон шахмат федерацияси раиси Азиз Абдухакимов ҳамда араб мамлакатлари шахмат федерацияси президенти, Шаржа шахмат ва маданият клуби президенти Шайх Сауд Абдулазиз Алмуалла иштирок этди.

Тадбирда сўзга чиққан Туризм ва спорт вазири А.Абдухакимов мусобақа юқори савияда ташкил этилгани, турнир давомида ҳакамларга нисбатан биронта ҳам эътироз бўлмагани, қолаверса ҳозирги пандемия шароитида Тошкентга 12 та давлатдан кучли шахматчиларнинг келишгани – бу дунё шахматида Георгий Агзамов хотирасига бағишланган турнирга бўлган қизиқиш юқори эканлигидан дарак беришини алоҳида таъкидлади.

Мусобақа низомига кўра, халқаро турнир ғолиби бўлган арманистонлик Ш.Саргисян 5 минг АҚШ доллари, 2-ўрин соҳиби Н.Абдусатторов 3 500 АҚШ доллари, 3-ўринни эгаллаган М.Хусенходжаев эса 2 500 АҚШ доллари билан тақдирланди. Шунингдек, 4-ўриндан 15-ўрингача бўлган шахматчилар ҳам пул мукофотларига сазовор бўлди.

Шахматчиларни олдинда яна бир халқаро турнир – 24-29 август кунлари қўҳна ва ҳамиша навқирон Самарқанд шаҳрида ўтадиган Соҳибқирон Амир Темур кубоги мусобақаси кутиб турибди.

Бундан аввал мусобақа якуний босқичга етгани ҳақида хабар берган эдик.

parolni qayta o'rnating

Quyida elektron pochta manzilingizni kiriting va biz sizga yangi parolni yaratish bo'yicha ko'rsatmalarni o'z ichiga olgan elektron pochta xabarini yuboramiz.