AQShning Florida shtatidagi federal sudyasi Stiven Merridey prezident Donald Tramp tomonidan The New York Times nashriga nisbatan 15 milliard dollarlik tuhmat da’vosini ko‘rib chiqishdan bosh tortdi.
Sud qarorida ta’kidlanishicha, Trampning da’vo arizasi protsessual talablarni to‘liq bajarmagan, unda javobgar tomonlarga qo‘yilgan talablarning aniq mazmuni va mohiyati ko‘rsatilmagan.
Sudyaga ko‘ra, da’vo hujjati raqibni haqoratlash yoki keskin tanqid qilish maydoni emas, balki aniq huquqiy asoslarni taqdim etuvchi hujjat bo‘lishi lozim.
Shu bilan birga, Merridey Trampga 28 kun ichida yangilangan, hajmi 40 betdan oshmagan holda qayta da’vo kiritish imkoniyatini berdi.
Ma’lumot uchun, 16-sentabr kuni Tramp The New York Times gazetasini “o‘nlab yillar davomida uning shaxsi, oilasi va biznesi hamda Amerika xalqi haqida yolg‘on ma’lumot tarqatgan” deb ayblagan edi. Shuningdek, u nashrni “radikal demokratlarning ovozi” sifatida ta’riflagan.