Avstriyada 48 yoshli erkak soxta diplomdan foydalangan holda 15 yil davomida o‘qituvchilik qilib kelgani aniqlandi.
Ma’lum qilinishicha, erkak hamyonini yo‘qotib qo‘ygach, huquq-tartibot idoralari uni tekshirish jarayonida qalbaki guvohnoma topgan. Shundan so‘ng uning hujjatlariga oid tergov ishlari boshlangan.
Politsiya gumonlanuvchining uyidan yuqori sifatda tayyorlangan qalbaki diplomni ham topdi. Tergov ma’lumotlariga ko‘ra, 2010-yildan beri u nemis tili va jismoniy tarbiya fanlaridan dars bergan.
O‘qituvchi so‘roq vaqtida jinoyatni tan oldi. Uning aytishicha, guvohnomadagi qalbakilik “faqatgina rekvizit” bo‘lgan.
Maktab ma’muriyati erkakka nisbatan xizmat faoliyatini to‘xtatdi. Agar sudda uning aybi isbotlansa, ikki yilgacha ozodlikdan mahrum etilishi mumkin.