Politico nashrining yozishicha, Buyuk Britaniya hukumati byudjet taqchilligini qisqartirish maqsadida xorijdagi ayrim diplomatik binolar va davlatga tegishli boshqa ko‘chmas mulklarni sotishni ko‘rib chiqmoqda. Bu haqda juma kuni e’lon qilingan hukumat hujjatlarida ma’lumot berilgan.
Xabarga ko‘ra, noyabr oyida Britaniya moliya vaziri Reychel Rivz mamlakatning 2026-yilgi byudjet rejasini taqdim etgan. Unda G‘aznachilik uchun qo‘shimcha 26 milliard funt sterling yig‘ish maqsad qilingan bo‘lib, buning bir qismi soliqlarni oshirish, yana bir qismi esa davlatga qarashli aktivlarni optimallashtirish hisobidan amalga oshirilishi ko‘zda tutilgan.
Mavjud rejalarga ko‘ra, Tashqi ishlar vazirligi o‘z balansidagi 6 500 ta mulk obyektini qayta ko‘rib chiqib, ular orasida “bo‘shatish” mumkin bo‘lgan, ya’ni sotilishi yoki qo‘llanilishi maqsadga muvofiq bo‘lmagan obyektlarni aniqlashi kerak. Nashrga ko‘ra, bu jarayonda Britaniyaning dunyo bo‘ylab diplomatik faoliyati sezilarli darajada qisqarishi ehtimoli bor.
Hujjatlarda qimmatbaho hududlardagi ayrim obyektlar, xususan, 2019-yilda AQSh bilan Brexitdan keyingi savdo muzokaralariga tayyorgarlik doirasida diplomatlar uchun xarid qilingan 15,7 million dollarlik Nyu-Yorkdagi hashamatli kvartira misol tariqasida keltirilgan.
Shuningdek, ma’lumotlarga ko‘ra, Buyuk Britaniyaning xorijdagi 933 ta diplomatik binosi, ya’ni taxminan 15 foizi, ekspluatatsiya uchun xavfli deb topilgan.
Byudjet bayonoti oldidan hukumat qarzlarga xizmat ko‘rsatish xarajatlari, ijtimoiy nafaqalar, kommunal to‘lovlarni qoplashga yordam dasturlari va iqtisodiy pasayish tufayli yuzaga kelgan o‘nlab milliard funtlik taqchillikni yopish zarurati bilan yuzlashgan edi.