2025 yil 1 oktabr holatiga O‘zbekistonning davlat qarzi 44 mlrd dollarni tashkil etdi. Uning 36,7 mlrd dollari tashqi qarz, 7,2 mlrd dollari ichki qarzdir. Bir yil ichida davlat qarzi qariyb 4,9 mlrd dollarga oshdi va YaIMga nisbatan ulushi 32,3 foizga yetdi. Aholi jon boshiga to‘g‘ri keladigan qarz miqdori esa 1154 dollar bo‘ldi.
Rasmiy ma’lumotlarga ko‘ra, jalb qilingan tashqi qarz mablag‘larining 47 foizi — byudjetni qo‘llab-quvvatlashga, 16 foizi energetika sohasiga, qolgan qismi qishloq xo‘jaligi, transport infratuzilmasi va uy-joy kommunal xizmatlariga yo‘naltirilgan. O‘zbekistonning asosiy kreditorlari orasida Jahon banki (8 mlrd dollar) va Osiyo taraqqiyot banki (7,5 mlrd dollar) yetakchilik qilmoqda. Tashqi qarzning 63 foizi dollarda, 12 foizi so‘mda, 8 foizi esa yevroda jalb qilingan.
Mutasaddi idoralar iqtisodiyotning kengayishi va yirik infratuzilma loyihalari sababli tashqi mablag‘larga ehtiyoj oshayotganini ta’kidlamoqda. Shu bilan birga, davlat kafolatisiz olingan tijorat qarzlari ham ko‘paygan: ular rasmiy davlat qarziga kirmasa-da, davlatga tegishli bank va korxonalar tomonidan olingani uchun “kvazi-davlat” majburiyatlari sifatida baholanadi. 2025 yilning birinchi yarmida O‘zbekistonning umumiy (davlat + xususiy) tashqi qarzi 72,2 mlrd dollarga yetgan.