Al Jazeera telekanali xabar qilishicha, Saudiya Arabistoni va Pokiston o‘rtasida yaqinda imzolangan o‘zaro mudofaa shartnomasi doirasida pokistonlik harbiylarni qirollik hududida joylashtirish imkoniyati muhokama qilinmoqda.
Maʼlumotlarga ko‘ra, bu faqat qo‘shma mashg‘ulotlar va o‘quv dasturlarini kengaytirish bilan cheklanib qolmay, balki Pokiston harbiy kontingentining Saudiyada vaqtinchalik yoki doimiy ravishda xizmat qilishi ehtimolini ham o‘z ichiga oladi.
Hozircha yakuniy qaror qabul qilinmagan, ammo mutaxassislar bu jarayonni ikki davlat munosabatlarida “burilish nuqtasi” sifatida baholamoqda.
Eslatib o‘tamiz, 17 sentyabr kuni Saudiya Arabistoni va Pokiston o‘zaro mudofaa shartnomasi imzolagandi. Unga ko‘ra, mamlakatlardan biriga qilingan tajovuz ikkalasiga ham hujum sifatida baholanadi. Shu bilan birga, Pokiston yadroviy davlat hisoblanadi.