Prezident Administratsiyasi rahbari Saida Mirziyoyeva giyohvand moddalar savdosi, jinoiy guruhlar faoliyati va noqonuniy qurol-aslaha aylanishiga qarshi kurashish bo‘yicha kengaytirilgan yig‘ilish o‘tkazilganini ma’lum qildi. Uchrashuvda mazkur yo‘nalishlarda qisqa muddatda samarali, muvofiqlashtirilgan tizim yaratish vazifasi kuch tuzilmalari rahbarlari oldiga qo‘yildi.
Mirziyoyeva ta’kidlashicha, giyohvandlik va unga bog‘liq jinoyatlar jamiyat xavfsizligi uchun jiddiy tahdid bo‘lib, ayniqsa yoshlar orasida dori vositalarining tarqalishiga yo‘l qo‘ymaslik davlatning ustuvor vazifalaridan biridir. U bu boradagi har qanday noqonuniy faoliyatga qat’iy choralar ko‘rilishini qayd etdi.
“Yosh avlodni giyohvandlik balosidan asrash, fuqarolar xavfsizligini ta’minlash — davlatning bevosita burchi. Bu yo‘nalishda qonun buzilishiga mutlaqo yo‘l qo‘yilmaydi”, — deya yozdi Saida Mirziyoyeva o‘z bayonotida.