20-sentabr kuni O‘zbekiston Respublikasi Prezidenti Shavkat Mirziyoyev Birlashgan Millatlar Tashkiloti Bosh Assambleyasining 80-yubiley sessiyasi tadbirlarida ishtirok etish maqsadida AQShning Nyu-York shahriga tashrif buyurdi.
Davlatimiz rahbarini J.F. Kennedi nomidagi xalqaro aeroportda AQSh Prezidenti ma’muriyatining global sherikliklar bo‘yicha maxsus vakili Paolo Zampolli, Amerika–O‘zbekiston savdo palatasi raisi Kerolin Lamm hamda boshqa rasmiy shaxslar kutib oldi.
Tashrif doirasida Prezident Shavkat Mirziyoyev BMT Bosh Assambleyasi umumiy munozaralarida nutq so‘zlashi, shuningdek, qator xorijiy mamlakatlar yetakchilari, xalqaro tashkilotlar va yirik moliyaviy institutlar rahbarlari bilan uchrashuvlar o‘tkazishi rejalashtirilgan.
Bundan tashqari, davlatimiz rahbari AQShning yetakchi kompaniyalari vakillari bilan davra suhbatida ishtirok etib, yirik transmilliy korporatsiyalar rahbarlari bilan ham muzokaralar olib boradi.