AQSh prezidenti Donald Tramp Truth Social platformasida avtopero — avtomatik imzo qo‘yuvchi qurilma — orqali imzolangan Jo Bayden davridagi barcha farmonlar va hujjatlar bekor qilinishini bildirdi. Trampning aytishicha, avtopero prezidentning maxsus ruxsatisiz qo‘llanmasligi kerak va Bayden tomonidan imzolangan hujjatlarning “taxminan 92 foizi” shu toifaga kiradi.
Avtopero asosan Baydenning prezidentlik muddatining oxirida, afv etish va jazoni yengillashtirish bo‘yicha hujjatlarni imzolash jarayonida ishlatilgan edi. Afv etilganlar orasida sobiq prezidentning o‘g‘li Hanter Bayden ham bor. Jo Bayden esa barcha qarorlarni shaxsan o‘zi tasdiqlaganini, texnik imzolash jarayonini esa yordamchilar bajarganini ta’kidlagan.
Tramp avval ham Baydenning avtopero orqali rasmiylashtirilgan afv hujjatlari haqiqiy emasligini da’vo qilgan edi. Bayden esa bu fikrni qat’iyan rad etib, barcha qarorlar qonuniy va shaxsiy tasdiqdan o‘tganini bildirgan.