Янги йилдан бошлаб ҳар йили “Энг яхши солиқ тўловчи маҳалла” сифатида эътироф этилган 100 та маҳаллага давлат буджетидан 2 миллиард сўмдан маблағ ажратилади. Ушбу ташаббус маҳаллаларнинг солиқ интизомини ошириш ва фаоллигини рағбатлантиришга қаратилган.
Рағбат чораларига кўра, ташаббусли буджет доирасида кетма-кет икки маротаба ғолиб бўлган маҳаллаларда навбатдаги мавсумларда лойиҳа киритишни чеклаш тартиби қўлланмайди. Шунингдек, лойиҳа қийматининг 25 фоизи аҳоли томонидан молиялаштирилса, қолган 75 фоизи давлат томонидан қоплаб берилади.
Танлов мезонларига кўра биринчи 100 таликка кирган маҳаллаларнинг ҳар бири 2 миллиард сўмлик маблағни “Маҳалла ижтимоий-иқтисодий муаммоларини ҳал этиш жамғармаси” орқали олади. Ушбу маблағ маҳалла инфратузилмасини яхшилаш, ободонлаштириш ва аҳолига қулайликларни оширишга йўналтирилади.