Политисо нашрининг ёзишича, Буюк Британия ҳукумати бюджет тақчиллигини қисқартириш мақсадида хориждаги айрим дипломатик бинолар ва давлатга тегишли бошқа кўчмас мулкларни сотишни кўриб чиқмоқда. Бу ҳақда жума куни эълон қилинган ҳукумат ҳужжатларида маълумот берилган.
Хабарга кўра, ноябрь ойида Британия молия вазири Рейчел Ривз мамлакатнинг 2026 йилги бюджет режасини тақдим этган. Унда Ғазначилик учун қўшимча 26 миллиард фунт стерлинг йиғиш мақсад қилинган бўлиб, бунинг бир қисми солиқларни ошириш, яна бир қисми эса давлатга қарашли активларни оптималлаштириш ҳисобидан амалга оширилиши кўзда тутилган.
Мавжуд режаларга кўра, Ташқи ишлар вазирлиги ўз балансидаги 6 500 та мулк объектини қайта кўриб чиқиб, улар орасида «бўшатиш» мумкин бўлган, яъни сотилиши ёки қўлланилиши мақсадга мувофиқ бўлмаган объектларни аниқлаши керак. Нашрга кўра, бу жараёнда Британиянинг дунё бўйлаб дипломатик фаолияти сезиларли даражада қисқариши эҳтимоли бор.
Ҳужжатларда қимматбаҳо ҳудудлардаги айрим объектлар, хусусан, 2019 йилда АҚШ билан Брехитдан кейинги савдо музокараларига тайёргарлик доирасида дипломатлар учун харид қилинган 15,7 миллион долларлик Нью-Йоркдаги ҳашаматли квартира мисол тариқасида келтирилган.
Шунингдек, маълумотларга кўра, Буюк Британиянинг хориждаги 933 та дипломатик биноси, яъни тахминан 15 фоизи, эксплуатация учун хавфли деб топилган.
Бюджет баёноти олдидан ҳукумат қарзларга хизмат кўрсатиш харажатлари, ижтимоий нафақалар, коммунал тўловларни қоплашга ёрдам дастурлари ва иқтисодий пасайиш туфайли юзага келган ўнлаб миллиард фунтлик тақчилликни ёпиш зарурати билан юзлашган эди.