Фарғона вилоятида ДХХ, Ички ишлар ва Божхона органлари томонидан гиёҳвандлик воситалари ва кучли таъсир қилувчи дориларнинг ноқонуний айланишига қарши бир қатор тезкор тадбирлар ўтказилди. Тадбирлар давомида «гашиш» моддаси ҳамда четдан контрабанда йўли билан олиб келинган «Регапен» дори воситаларини сотиш билан шуғулланган бир нечта шахс қўлга олинди.
Марғилон шаҳрида 1996 йилда туғилган фуқаро бошқарувидаги «Матиз» автомашинасини кўздан кечириш вақтида 866 грамм «гашиш» борлиги аниқланиб, далилий ашёлар сифатида олиб қўйилди. Терговга қадар ўтказилган ҳаракатларда гумонланувчининг мазкур моддани сотиш орқали фойда олишни режалагани маълум бўлди. Унга нисбатан ЖКнинг тегишли моддалари билан жиноий иш қўзғатилиб, эҳтиёт чораси сифатида қамоқ қўлланди.
Яна бир ҳолатда, Фарғона ва Андижон шаҳарлари аҳолиси орасида кучли таъсир қилувчи «Регапен» дори воситаларини ноқонуний сотаётган шахслар аниқланган. Тезкор ҳамкорликда ўтказилган тадбирда Қўрғонтепа туманида яшовчи икки нафар шахс 4 508 дона контрабанда дори воситасини 12 800 АҚШ долларига сотмоқчи бўлган вақтида ушланди. Улар устидан контрабанда ва кучли таъсир қилувчи дориларнинг ноқонуний айланиши бўйича жиноий иш очилди. Мутасадди ташкилотлар бу каби воситаларнинг ноқонуний савдоси ёшлар саломатлиги ва жамият ривожига жиддий хавф эканини эслатди.