Ўзбекистонда картошкачилик йўналишини ривожлантириш мақсадида учта янги норматив-ҳуқуқий ҳужжат қабул қилинди. Биринчи ҳужжат Қишлоқ хўжалиги вазирлигига республика буджети ҳисобидан ажратиладиган маблағлар орқали вирус ва бактерия касалликларидан холи картошканинг мини-туганакларини етиштириш харажатларини молиялаштириш тартибини белгилайди.
Иккинчи ҳужжат картошканинг “in-vitro” ўсимлиги, микро ва мини-туганакларини тайёрлаш ҳамда юқори авлодли уруғлик картошка етиштириладиган ҳудудлар ва ишлаб чиқарувчиларга қўйиладиган талабларни тасдиқлайди.
Учинчи тартиб эса ихтисослаштирилган туманлардаги картошка етиштирувчи корхоналар, илмий муассасалар ва тадбиркорлик субъектлари ўртасида мини-туганаклар бўйича тузиладиган шартномаларни рўйхатдан ўтказиш ва юритиш механизмини белгилайди.