2025 йил 1 октябрь ҳолатига Ўзбекистоннинг давлат қарзи 44 млрд долларни ташкил этди. Унинг 36,7 млрд доллари ташқи қарз, 7,2 млрд доллари ички қарздир. Бир йил ичида давлат қарзи қарийб 4,9 млрд долларга ошди ва ЯИМга нисбатан улуши 32,3 фоизга етди. Аҳоли жон бошига тўғри келадиган қарз миқдори эса 1154 доллар бўлди.
Расмий маълумотларга кўра, жалб қилинган ташқи қарз маблағларининг 47 фоизи — бюджетни қўллаб-қувватлашга, 16 фоизи энергетика соҳасига, қолган қисми қишлоқ хўжалиги, транспорт инфратузилмаси ва уй-жой коммунал хизматларига йўналтирилган. Ўзбекистоннинг асосий кредиторлари орасида Жаҳон банки (8 млрд доллар) ва Осиё тараққиёт банки (7,5 млрд доллар) етакчилик қилмоқда. Ташқи қарзнинг 63 фоизи долларда, 12 фоизи сўмда, 8 фоизи эса еврода жалб қилинган.
Мутасадди идоралар иқтисодиётнинг кенгайиши ва йирик инфратузилма лойиҳалари сабабли ташқи маблағларга эҳтиёж ошаётганини таъкидламоқда. Шу билан бирга, давлат кафолатисиз олинган тижорат қарзлари ҳам кўпайган: улар расмий давлат қарзига кирмасада, давлатга тегишли банк ва корхоналар томонидан олингани учун «квази-давлат» мажбуриятлари сифатида баҳоланади. 2025 йилнинг биринчи ярмида Ўзбекистоннинг умумий (давлат + хусусий) ташқи қарзи 72,2 млрд долларга етган.