Россия Либерал-демократик партияси (ЛДПР) раҳбари Леонид Слуцкий меҳнат мигрантларига пенсия тўлаш амалиётини бекор қилишни таклиф қилди. Унинг таъкидлашича, давлатнинг молиявий юклари кескин ортиб бормоқда, шу сабабли нафақалар фақат миллий манфаатларга хизмат қилган фуқароларга берилиши лозим.
Слуцкийнинг сўзларига кўра, 2024 йилда миграциянинг соф ўсиши 600 минг кишига етиб, сўнгги 30 йиллик рекордни қайд этди. “Пенсия — бу шунчаки рўйхатда туриш эмас, балки давлат ҳаётида фаол иштирок этишнинг натижасидир”, — дея қайд этди сиёсатчи.
Унинг фикрича, чет эллик фуқароларга пенсия тўлаш давлат бюджетига ортиқча юк солмоқда. Шу боис ЛДПР етакчиси “кел, ишланг ва қайтинг” тамойилига асосланган муносабатларни йўлга қўйиш зарурлигини билдирди.
Амалдаги қонунчиликка кўра, ҳозирда Россияда камида 15 йил доимий яшаган хорижий фуқаролар ва фуқаролиги бўлмаган шахслар пенсия олиш ҳуқуқига эга. Слуцкий эса бу тартибни қайта кўриб чиқиш лозимлигини таъкидлади.
Мутахассисларнинг қайд этишича, мазкур таклиф пенсия тизимини ортиқча ижтимоий мажбуриятлардан ҳимоя қилиш ва давлат бюджетига тушадиган босимни камайтиришга қаратилган.
Шу билан бирга, октябр ойидан бошлаб Россияда айрим тоифа нафақахўрларнинг пенсиялари 7,6 фоизга индексация қилиниши белгиланган. Бу, хусусан, Мудофаа вазирлиги ҳамда бошқа ҳуқуқ-тартибот органлари ходимларига тааллуқли бўлади.