Ўзбекистон Республикаси Олий Мажлиси Сенати Вазирлар Маҳкамасига қурилишларни тартибга солиш бўйича кўрилаётган чоралар юзасидан парламент сўрови юборди. Унда кўп қаватли уйларга туташ ҳудудларда ўзбошимчалик билан қурилиш қилинаётгани ва умумий фойдаланиш жойларини тўсиб олиш каби ҳолатлар муаммо сифатида қайд этилган.
Сенат Раиси Танзила Норбоева ҳам бу бўйича депутатлар нега ҳокимларга қарши гапирмаётганини танқид остига олган.
“Маҳаллада болалар ўйгайдиган кичкинагина жой бўлса ҳам, қурилиш қиламан деб тадбиркорлар етиб келяпти. Ҳокимият буни қўллаб-қувватлаяпти. Маҳалла ҳам индамасдан розилик ёзиб беряпти. Одамлар эса норози бўлиб мурожаат қилишяпти бизга.
Аслида маҳалла еттилиги, маҳаллий депутатлар бунга қарши туриши керак. Етарли куч бор-ку, ахир уларда”, деган Норбоева.
Маълум қилинишича, 2024 йил ва 2025 йилнинг ўтган даври мобайнида кўп квартирали уйларнинг техник ҳолати билан боғлиқ 8 мингдан ортиқ қонун бузилиш ҳолатлари содир этилган. Шундан, 431 та таянч конструкциялар, 2,6 мингта тўсиқ конструкциялар бузилган, 3,3 мингдан ортиқ кўп квартирали уйларга туташ майдонларда ноқонуний қурилмалар қурилган, 1,8 мингдан ортиқ умумий фойдаланишдаги жойлар ўзбошимчалик билан тўсиб олинган.