Eron va AQSH o‘rtasidagi muzokaralar haqida bir-biriga zid xabarlar kelib tushmoqda – OAV

AQSH va arab ommaviy axborot vositalari tomonlar Eron va Hormuz bo‘g‘ozi blokadasini bekor qilish, shuningdek, sulhni 60 kunga uzaytirishni nazarda tutuvchi memorandum bo‘yicha kelishuvga yaqinlashganini yozmoqda.

 

Al Hadath manbalariga ko‘ra, Tehron va Vashington o‘rtasidagi dastlabki kelishuv “Islomobod deklaratsiyasi” deb nomlanadi. Qayd etilishicha, hujjat ikki davlat muzokara guruhlarining shaxsiy uchrashuvisiz tez orada imzolanishi mumkin. 

 

Shuningdek, 5-iyun kuni muzokaralarning yangi raundi bo‘lib o‘tishi aytilmoqda.

 

Ayni paytda, Eron ommaviy axborot vositalari ikki davlat o‘rtasida hali ham jiddiy kelishmovchiliklar saqlanib qolayotganini bildirmoqda.

 

Tasnim agentligi o‘z manbalariga tayanib xabar berishicha, AQSH va Eron o‘rtasidagi ehtimoliy kelishuv bandlari bo‘yicha bahslar hanuz hal etilmagan. Xususan, muzlatilgan Eron aktivlarining bir qismi birinchi bosqichdayoq ozod etilmas ekan, hech qanday kelishuv bo‘lmasligi ta’kidlangan.

 

Tehron avval ham aktivlarni ozod qilish bo‘yicha majburiyatlar buzilganini eslatib, har qanday dastlabki kelishuv ushbu aktivlarning kamida bir qismini amalda qaytarish bilan birga kechishi kerakligini bildirgan.

 

Shu bilan birga, Eron Hormuz bo‘g‘ozi bo‘yicha yon bosganini tasdiqlamayapti. Fars axborot agentligi Donald Trampning bo‘g‘ozni “avvalgi holatiga qaytarish” haqidagi bayonotlari haqiqatga to‘g‘ri kelmasligini ma’lum qildi.

 

Agentlikka ko‘ra, tomonlar almashgan so‘nggi kelishuv loyihalarida ehtimoliy kelishuvga erishilgan taqdirda ham Hormuz bo‘g‘ozi Eron nazoratida qolishi belgilangan. Shuningdek, Tehron kemalar harakatini urushdan oldingi darajaga qaytarishga rozilik bildirgan, biroq bu “erkin o‘tish” tartibiga to‘liq qaytishni anglatmasligi ta’kidlangan.