Италияда сохта COVID сертификатларини тайёрлаган Тelegram каналлари ёпилди
Сицилия Катания провинцияси прокуратураси “Telegram” мессенжерида сохта COVID сертификатларини сотиб олишни таклиф қилган иккита канални ёпди. Сохта сертификатлар 250 евро эвазига берилган. Бу ҳақда “Риа Новости” хабар берди.
Италия полицияси мазкур қаллоблик юзасидан тергов ҳаракатлари олиб борди. Ҳуқуқни муҳофаза қилиш органлари иккала канал ҳам криптовалютада 250 еврога сохта сертификат таклиф қилганини аниқлади. Бунинг оқибатида “Green Bypass 2.0” вa “Authentic Green Pass Sale” деб номланган каналлар ёпилди.
Маълумот учун: COVID сертификати Италияда ҳукумат қарорига мувофиқ август ойида жорий этилган, 15 октябрдан кучга кирган. Қарорга кўра, сертификат давлат идоралари, хусусий ишлаб чиқариш ва офисларга кириш учун мажбурий тақдим этилади.
Эслатиб ўтамиз, бундан аввал Ҳиндистонда сохта вакцина билан эмланган шифокорлар қўлга олингани ва ижтимоий саҳифасида Афғонистонда қолиб кетганини айтган британиялик талабанинг аккаунти блоклангани ҳақида хабар берилганди.
Чўлпоной Аҳмедова
