Ижтимоий саҳифасида Афғонистонда қолиб кетганини айтган британиялик талабанинг аккаунти блокланди
Британиялик талаба Майлз Раутледж ёзги таътилда “дунёдаги энг ёмон жойлардан бири”ни бориб кўришни режалаштирган эди.
У Афғонистонни «Толибон» эгаллаётганини билсада, президент Ашраф Ғани ҳукумати бунчалик тез таслим бўлишини кутмаган эди.
Майлз толиблар томонидан ўғирланиши мумкинлигини билиб, ҳар эҳтимолга қарши Лорд мавқеига мансублиги тўғрисида сертификат сотиб олган ва кредит карта расмийлаштирган. У 13 август куни Кобулга етиб келди. Нохуш воқеа содир бўлган тақдирда толибларга ўлпон таклиф қилишни режалаштирган.
Сохта лорд Раутледж ижтимоий тармоқларда ўз таассуротлари билан бўлишишни бошлади. У сафарга чиқишдан олдин ўз танловини қуйидагича изоҳлаган:
Мен пляжда ётишни ёмон кўраман. Шунинг учун ноодатий иш қилдим. Мен Афғонистон жуда гўзал ва бунинг устига, арзон деган қарорга келдим. Бу ерда ростдан ҳам ҳамма нарса арзон. Тўйимли тушлик бир долларга ҳам етмайди
Антиқа саёҳатчи бошқаларни ҳам Кобулга таклиф қилган. Аммо вазият оғирлашганда «лорд» ҳам хавотирлана бошлади.
“Маҳаллий ҳарбийлар билан учрашдим, яхши одамлар экан. Рейслар бекор қилинган, аммо ўйлашимча эвакуация қилиш мумкин бўлади”, —деб ёзган у.
Британиялик "антиқа" сайёҳатчи қўрққанидан миллий либос сотиб олиб, хавф туғилганда ўзини афғонистонлик деб таништиришни режалаштирди.
У ёрдам сўраб Британия элчихонасига борганида, элчихона ёпилиб бўлган эди. Аэропортда эса пойтахт тўлиқ толиблар назоратига ўтгани ва мамлакатдан чиқиб кетишнинг ҳеч қандай имкони қолмаганини билди.
Ҳозир у ижтимоий саҳифасини БМТ ижарага олган бинолардан бирида туриб юритмоқда.
“Балки мени эртага эвакуация қилишар, балки бир ойдан кейин. Аммо нима бўлган тақдирда ҳам бу университет ётоқхонасидан яхшироқ”, — деган у ўзининг блогида.
Майлзнинг постлари интернетда қизғин муҳокамаларга сабаб бўлмоқда. Айримлар унинг ҳикоялари ростлигига ишонмаса, бошқалар буни руҳий касалликка йўйишмоқда.
Сохта лорднинг сўнгги пости кеча, 16 август куни эълон қилинган.
“Менга ҳимоя воситаси берилади, эвакуация қилишади ва хавфсиз жойга олиб кетишади. Мен энг яхшилар билан биргаман”, —деб ёзган у.
Шундан сўнг унинг аккаунти ёпилган.
Шарофат Маҳмудова
