Жанубий Корея ва КХДР ўртасидаги алоқа тизими 55 кунлик танаффусдан сўнг тикланди
Жанубий Корея ҳукумати КХДРнинг кореялараро алоқа тизимини тиклашини Пхеньяннинг Корея яриморолида тинчлик ўрнатишга интилиши сифатида баҳолайди. Бу ҳақда "Рёнхап" агентлиги Корея Республикаси бирлашув вазирлиги маълумотларига таяниб хабар қилди.
Бундан аввал Пхеньян жануб билан тўғридан тўғри алоқа тикланганини маълум қилганди. Шимол 55 кун умуман алоқага чиқмаган эди. " Ҳукумат алоқа тизимининг тикланишини Шимолий Кореянинг кореялараро муносабатлар тикланиши ва яриморолда барқарорлик ўрнатишга тайёрлиги сифатида баҳоламоқда", — дейилган бирлашув вазирлиги хабарида.
Шунингдек, алоқа тизими тикланиши орқали бундан буён мулоқотнинг тўхтаб қолмаслигини таъминланишига умид билдирилган.
Шимол ва Жануб ўртасида жами бешта алоқа канали бор. Август бошларида Пхеньян 4 канал орқали мулоқотни бутунлай тўхтатиб қўйганди. 5 канал эса икки давлат разведка хизматлари ўртасида бўлиб, катта эҳтимол билан ҳеч қачон тўхтаб қолмаган.
Эслатиб ўтамиз, бундан аввал КХДР янги ракета синовлари ўтказгани ҳамда Ким Чен Иннинг синглиси Сеулга шарт қўйгани хабар қилинганди.
Жаҳонгир Қўзиев
