Ким Чен Иннинг синглиси Жанубий Кореяга шарт қўйди
Шимолий Корея Сеул билан мулоқот бошлаш учун ўз шартини айтди. Бу ҳақда “РИА новости” хабар бермоқда.
Ким Чен Иннинг синглиси Ким Ё Чжоннинг айтишича, Жанубий Корея шимолга нисбатан душманлик муносабатини тўхтатса, Пхеньян мулоқотга тайёр. Ким Ё Чжон жанубни иғвогарона ҳаракатларни амалга ошириш ҳамда икки хил стандартларга амал қилишда айблади.
У икки давлат ўртасидаги уруш якунланганини расман эълон қилиш учун ўзаро “кафолатланган ҳурмат” бўлиши кераклиги, иккинчи томонга нисбатан “даҳшатли душманлик муносабатидан, адолатсиз икки хил стандартлардан” воз кечиш лозимлигини таъкидлаган.
Жанубий Корея Президенти Мун Чже Ин БМТ Бош Ассамблеясидаги чиқишида АҚШ ва Хитой иштирокида Корея яриморолида уруш тугаганини эълон қилишни таклиф қилди. Ким Ё Чжон бу баёноти орқали Жанубий Корея раҳбарига ўзига хос жавоб берди.
Эслатиб ўтамиз, бундан аввал Шимолий Корея янги ракета синовларини ўтказгани ҳақида хабар берилганди.
Жаҳонгир Қўзиев
