"Айни пайтда бутун дунё кейинги қадамларини ўйлаши керак. Олдимизда иккита йўл бор. Агар Афғонистонга эътибор бермасак, ҳозирнинг ўзида 50 фоиз, кейинги йил эса 90 фоиз аҳоли ўта қашшоқлик ёқасида қолади. Олдинда бизни улкан гуманитар инқироз кутмоқда. Бу нафақат Афғонистон қўшнилари, балки бутун дунё учун ўта салбий таъсир кўрсатади", — деган Имрон Хон БМТ Бош Ассамблеясидаги чиқишида.
Шунингдек, у беқарор Афғонистон яна қайтадан террорчиларга бошпана бўлишидан огоҳлантирди. " Шунинг учун олдимизда бир йўл бор: Биз афғон халқи учун ҳозирги ҳукуматни мустаҳкамлашимиз ва барқарорлаштиришимиз керак", — дея қайд этган. Шу билан бирга ҳозир Афғонистон танг аҳволда экани, шунинг учун вақт ҳал қилувчи аҳамиятга эгалигини қўшимча қилган. Имрон Хон "Вақтингизни беҳуда ўтказманг. У ерга гуманитар ёрдам дарҳол берилиши керак", — деб айтган.
Афғонистонда гуманитар вазият тобора ёмонлашиб бормоқда. Ҳозирда кўплаб давлатлар ёрдам бераётганига қарамай, аҳвол оғирлигича қоляпти.
Эслатиб ўтамиз, аввалроқ "Толибон" ўз аскарларидан амнистия шартларига амал қилишни талаб қилганди.