Польша мигрантлар сони ошаётганига Минскни айблашда давом этмоқда
Польша чегара хизмати камида 10 минг кишининг Европа Иттифоқига кирмоқчи бўлаётганини маълум қилди. Жумладан, 4 сентябрь куни 215, 5 сентябрь куни 152 кишининг ноқонуний кириб келиши олди олинган.
Польша чегара хизмати раҳбари генерал Тома Прага фикрича, қочоқларнинг мамлакат сарҳадларини ноқонуний кесиб ўтилишида мигрантларни Осиё ва Африкадан Европага киритиш билан шуғулланадиган халқаро гуруҳлар иштирок этган. DW нашрига кўра, мигрантларнинг аксарияти Польшага келишини билмаган.
Варшава бу каби ҳаракатларда Беларусни айбламоқда. Генерал Праганинг қайд этишича, Беларусь Президенти Александр Лукашенко мигрантларни олиб келган ва қисқа муддатдан сўнг Литва, Латвия ва Польша чегарасига чиқариб юборган. Ҳозирда бу уч давлат Беларусь билан туташ ҳудудларда фавқулодда вазият жорий этган.
2021 йил май ойида Лукашенкога қарши санкциялар кучайтирилгандан сўнг Беларусь раҳбари мигрантларнинг ЕИга ўтиб кетишига тўсқинлик қилмаслигини маълум қилган эди.
Бундан аввал Минск Польшани мигрантларни чегарадан сиқиб чиқаришда айблаган эди.
Жаҳонгир Қўзиев
