Ғоя муаллифи ва асосчиси
Ғоя муаллифи
Фирдавс Абдухаликов — медиа менежер, Ўзбекистон Республикасида хизмат кўрсатган журналист.
Самарқанд давлат университети филология факультети битирувчиси Фирдавс Абдухаликов Ўзбекистондаги биринчи нодавлат телерадиокомпания ҳамда илк кўнгилочар-ахборот газетасининг асосчисидир.
1991 йил март ойида Самарқанд шаҳрида мустақил STV телеканали орқали илк телевизион дастур эфирга узатилди. 1996 йилда телеканал қошида “Даракчи” газетаси таҳририяти ташкил этилди ва у кейинчалик Ўзбекистондаги энг катта тиражга эга нашрга айланди. 2000 йилда STV Самарқанд шаҳрида FM 104.5 тўлқинида радиоэшиттиришни йўлга қўйди.
Бу ютуқлар жамоатчилик ва республика раҳбарияти эътиборини тортди. 1998 йилда Абдухаликов “Ўзтелерадиокомпания” раисининг ўринбосари этиб тайинланди, 1999 йилда эса Ўзбекистон Республикаси Олий Мажлисининг иккинчи чақириқ депутати этиб сайланди. У ерда Ёшлар масалалари бўйича комиссия раиси ҳамда Ўзбекистон Президенти матбуот хизмати бош маслаҳатчиси сифатида фаолият юритди.
Фаол сиёсий ва жамоат ишларига қарамасдан, Фирдавс Абдухаликов медиа соҳасидаги фаолиятини давом эттирди. 2002 йилда “Пойтахт” радиосини ташкил этди. Бир йил ўтиб, мамлакатда цивилизациялашган эфир бозорини шакллантириш мақсадида НАЭММни ташкил қилди ва унга юздан ортиқ мустақил таҳририятлар аъзо бўлди. 2006 йилда Фирдавс Фридунович “Uzbekistan Today” ахборот агентлигини таъсис этди. У Ўзбекистонда инглиз тилида газеталар нашр этган илк ахборот воситаси бўлиб, 45 давлатда тарқатилди ва мамлакатнинг халқаро ахборот майдонидаги муҳим овозига айланди.
2014 йилда Абдухаликов миллий ёшлар учун мўлжалланган кўнгилочар-маърифий “Менинг Юртим 5” телеканалини ишга туширди. У томошабинлар томонидан илиқ кутиб олинди ва MY5 қисқартмаси билан кенг танилди. Канал ҳозиргача мамлакатдаги энг оммабоп телеканаллардан бири ҳисобланади.
2016 йилда Абдухаликов “Пресс-клуб: Сайлов-2016” лойиҳаси муаллифи бўлди. 2017 йилда эса “Севимли” телеканалини ташкил қилди ва у бугунги кунда мамлакат эфир маконидаги энг муваффақиятли телеканаллардан бири ҳисобланади.
Шу билан бирга, Фирдавс Абдухаликов илмий фаолият билан ҳам шуғулланади. 2007 йилда иқтисод соҳасида диплом олган, 2023 йилда эса санъатшунослик бўйича фалсафа доктори илмий даражасини қўлга киритган. 2017 йилдан буён у Ўзбекистон маданий меросини ўрганиш, сақлаш ва оммалаштириш бўйича Жаҳон жамияти бошқарув кенгаши раиси ҳисобланади. Унинг илмий портфелида ўнлаб китоб ва мақолалар мавжуд.
2014 йилдан бошлаб Фирдавс Абдухаликов кинопродюсер сифатида ҳам фаолият юритмоқда. 2019 йилдан буён Республика кинематография агентлигига раҳбарлик қилмоқда. 2024 йил 5 июндаги ҳукумат қарорига мувофиқ, у Ислом цивилизацияси маркази раҳбари этиб тайинланди. Унинг асосий вазифалари Марказ концепциясини ишлаб чиқиш, мазмун жиҳатдан шакллантириш ва уни мамлакатдаги етакчи илмий мажмуалардан бири сифатида тўлиқ ишга туширишдан иборат.