23 ёшли велопойгачида допинг аниқланди
Спортчи аввал енгил атлетика билан шуғулланган. У бу йил велоспорт тури билан шуғуллана бошлаган.
Буюк Британия паралимпия терма жамоаси аъзоси кўзи ожиз велопойгачи Эрин Макбрайд 2021 йилнинг март ойида ўқув-машғулот давомида топширган допинг-синамасида “остарин” тақиқланган моддаси аниқланганидан кейин уч йилга дисквалификация қилинди.
Ушбу ҳолат бўйича олти ой давомида текшириш ва суриштирув ишлари олиб борилган.
23 ёшли Макбрайд аввал паралимпия енгил атлетикаси билан шуғулланиб, 16 ёшида кўзи ожизлар ўртасида 400 метр масофага югуриш бўйича жаҳон чемпиони бўлган. У жорий йилда велоспортга ўтган.
Маълумот учун: “остарин” тақиқланган моддаси Токио-2020 олимпиадасида британиялик спринтер Чиджинду Уджда ҳам аниқланганди.
Аввалроқ ўзбекистонлик 7 нафар спортчида ҳамда Ўзбекистонда хизмат кўрсатган спортчида допинг аниқланганди. Шунингдек, допинг-таҳлил натижалари Диёрбек Ўразбоевнинг “Рио-2016” Олимпиадасидаги медалига ҳеч қандай таъсир ўтказмаслиги ҳақида хабар берилганди.
Баҳринисо Мадумарова
