Ўзбекистонлик 7 нафар спортчида допинг аниқланди
Уларнинг 3 нафари халқаро мусобақа иштирокчиси ҳисобланади Бу ҳақда АОКАда ўтказилган брифингда Миллий антидопинг агентлиги ахборот хизмати раҳбари Ҳумоюн Омонов маълум қилди.
Қайд этилишича, агентлик томонидан ўтган 9 ой давомида барча спорт турлари бўйича ўзбекистонлик спортчилардан 312 та допинг-синамалар олинди ва 4 та спортчи тақиқланган модда истеъмол қилганлиги аниқланди.
Бундан ташқари, 3 та халқаро мусобақада ҳам допинг-синамаларни олиш Агентликка ишониб топширилди. Натижада, 41 нафар спортчи текширувдан ўтказилиб, уларнинг 3 нафари тақиқланган модда истеъмол қилганлиги маълум бўлди.
“Токио-2020” ёзги Олимпия ва Паралимпия ўйинлари давомида барча спортчилар қатори ўзбекистонлик спортчилардан ҳам допинг-синамалар олинди.
Шу билан бирга, ўзбекистонлик олимпия спотчиларининг 16 нафаридан допинг-синама олиниб, улардан 11 таси мусобақадан олдин текширилган бўлса, 5 таси бевосита мусобақа финалидан кейинги даврга тўғри келди.
Таъкидланишича, паралимпия спортчиларимиздан эса жами 39 та допинг-синама олинган ва улардан 21 таси мусобақадан олдин ва 18 таси мусобақа даврини ўз ичига олади.
Мусобақадан олдин олинган тезкор допинг-синамаларнинг барчасида тақиқланган моддалар аниқланмаганлиги боис спортчиларимиз баҳсларда иштирок этди.
Маълумот ўрнида: мусобақа совринли ўринларга сазовор бўлган жаҳон ҳамда олимпия ва паралимпия рекордларини ўрнатган спортчиларимиз допинг-текширувидан ўтди. Одатда, улар тезкор таҳлил қилинмаслиги боис, натижалар белгиланган муддатларда эълон қилинади.
Бундан аввал спортчиларимиз вирусдан ўзини қандай ҳимоя қилаётгани ҳақида хабар берилганди.
Чўлпоной Аҳмедова,
Жамшидбек Амиров
