БМТ 2022 йилгача дунё аҳолисини тўлиқ эмланишига эришмоқчи
БМТ Бош Ассамблеяси 76 сессияси раиси Абдулла Шахин бутун дунё 2022 йил охирига қадар коронавирусга қарши тўлиқ эмланишига умид билдирди.
“Мен ўз ваколатимдан фойдаланиб барчани бирлашишга чақираман. Бизнинг асосий вазифамиз –– 2022 йилгача дунё бўйича тўлиқ эмланишни таъминлаш”, – деган Шахин.
У Бош Ассамблея 193 давлатдан иборатлигини, ўтган ҳафтада кўплаб давлатлар, хусусан, Хитой, Ҳиндистон, АҚШ ва вакцина ишлаб чиқарадиган бошқа давлатлар томонидан ижобий сигналлар бўлганини қўшимча қилган.
Олимлар коронавирусни енгишнинг ягона йўли эмланиш эканини таъкидлаб келмоқда. ЖССТ режасига кўра, 2021 йил охирига қадар сайёра аҳолисининг 40 фоизини, 2022 йил охирида эса 70 фоизини эмлаш кўзда тутилган.
Аввалроқ ЖССТ раҳбари Гебрейесус вакциналар тақсимотидаги адолатсизлик тўғрисида гапирганди. Шунингдек, вакциналар тенг тақсимланмаса, пандемия давом этиши ҳақида хабар берилган эди.
Жаҳонгир Қўзиев
