ЖССТ раҳбари вакциналар тақсимотидаги адолатсизликка эътибор қаратди
ЖССТ бош директори Тедрос Аданом Гебрейесус Covid-19' га қарши вакциналарнинг нотенг тақсимланганига эътибор қаратди. У бу ҳақда Бутунжаҳон лидерлари форумида айтиб ўтган.
Гебрейесус ҳозирга қадар Ер шари аҳолисининг учдан бири тўлиқ эмланганини ва умумий ҳисобда 6 миллиард доза вакцина қўлланганини маълум қилди. Шу билан бирга вакцинанинг 75 фоизини юқори даражадаги даромадли давлатлар аҳолиси олгани таъкидланди. Қашшоқ давлатлар эса бутун жаҳондаги вакциналарнинг 0.5 фоизини қўлга киритган. Унинг сўзларига кўра, бутун Африка қитъасида бор йўғи 4 фоиз аҳоли коронавирусга қарши тўлиқ эмланган.
Гебрейесус ЖССТнинг асосий мақсадини эслатиб ўтди. Унга кўра, ташкилот 2021 йил охирига қадар сайёранинг 40 фоиз аҳолисини, 2022 йил охиригача эса 70 фоиз аҳолисини тўлиқ вакцинациядан ўтказмоқчи. Бунинг учун жараёнга вакциналарнинг глобал миқиёсда етказиб берадиган компаниялар ва давлатлар ўз ҳиссасини қўшиши керак.
Аввалроқ ЖССТ коронавируснинг келиб чиқиши бўйича янги текширув ўтказмоқчи экани ҳамда Ухань лабораториясида 2018 йилдаёқ вирус билан боғлиқ синовлар ўтказилгани хабар қилинганди.
Жаҳонгир Қўзиев
