Москва конференцияси иштирокчилари ва қўшниларимиздан бизни қўллаб-қувватлашларини сўрамоқчимиз — Забиҳулло Мужоҳид
“Толибон” Москва форматидаги учрашувда иштирокчилардан иқтисодий ва сиёсий қўллаб-қувватлашни сўрамоқчи. Бу ҳақда ҳаракат расмий вакили Забиҳулло Мужоҳид “ТАСС” нашрига маълум қилди.
“Москва конференцияси иштирокчилари ва қўшниларимиздан бизни, айниқса, иқтисодий ва сиёсий-дипломатик соҳада қўллаб-қувватлашларини сўрамоқчимиз”, – деган Мужоҳид.
Шу билан бирга толиблар вакили Афғонистон минтақа хавфсизлиги ва барқарорлигида муҳим роль ўйнашини таъкидлаган. “Толибон” делегацияси ҳам айнан шу масалани муҳокама қилади.
“Табиийки, конференцияда сиёсий ва иқтисодий масалалар, шунингдек, Афғонистон ҳамда минтақа тинчлиги муаммолари кўтарилади”, – деб қўшимча қилган Мужоҳид.
Москва форматидаги учрашув бугун, 20 октябрь куни бўлиб ўтади. Унда “Толибон” делегациясига бош вазир ўринбосари Абдул Салом Ханафий бошчилик қилади. Шунингдек, ташқи ишлар вазири в.б. Амирхон Мутаққий ҳам иштирок этиши кутиляпти.
Бундан аввал Ўзбекистон ва “Толибон” ишчи гуруҳлар тузишга келишиб олгани ҳамда АҚШнинг Афғонистондаги сиёсати қайта кўриб чиқилиши хабар қилинганди.
