Залмай Халилзод АҚШнинг Афғонистон бўйича махсус вакили лавозимидан кетади. У 18 октябрь куни Энтони Блинкен номига ариза ёзган. Унда “Толибон” билан Афғонистон собиқ ҳукумати ўртасида эришилган келишувлар режадагидек амалга ошмагани қайд этилган. Халилзод ўрнини унинг ўринбосари бўлиб ишлаган Томас Уэст эгаллайди. Уэст 2012-2015 йилларда, Барак Обама президентлиги даврида Миллий хавфсизлик кенгашида Афғонистон ва Покистон йўналишида фаолият олиб борган. Шу билан бирга у Президентнинг Жанубий Осиё бўйича маслаҳатчиси бўлган.
Бундан ташқари АҚШ давлат департаменти Афғонистондаги элчихона фаолияти юзасидан текширув ўтказади.
Текширув энг аввало АҚШнинг Афғонистондаги дипломатик иштироки тугатилиши ҳамда эвакуация қилиниши тартибини ўрганишга қаратилган. Politico маълумотларига кўра, шу билан бирга виза берилиши керак бўлган шахслар, уларнинг АҚШга кўчирилиши ва Кобул аэропортидан фавқулодда эвакуация қилиниши ҳам текширилади. Гап бу ерда нафақат афғонлар, балки АҚШ фуқаролари ҳақида ҳам кетмоқда.
Лекин АҚШ давлат департаменти вакили Райан Холденнинг айтишича, “бу лойиҳани суриштирув сифатида баҳоланиши хато. Биз Конгрессга лойиҳани умумий текширув сифатида кўрсатдик”.
Ҳозирда Конгресснинг бир неча қўмитаси Вашингтоннинг Афғонистондан шошилинч чиқиб кетишини ўрганмоқда. Шунингдек, АҚШ ҳукуматининг Афғонистонни тиклаш масалалари бўйича бош инспектори Жон Сопко ва Пентагон инспектори вазифасини бажарувчиси Шон о’Доннелл ҳам юқоридаги каби умумий текширув ўтказиши мумкин.
Бундан аввал АҚШда афғон қочқинларини жойлаштиришда муаммо юзага келгани ҳамда АҚШга нисбатан иттифоқчиларнинг ишончсизлиги ортгани хабар қилинганди.
Жаҳонгир Қўзиев