Қашқадарёда ЙПХ ходимлари томонидан калтакланган фуқаролар қамоққа олинди
Қаршидаги жанжал тафсилотлари бўйича дастлабки маълумот берилди.
Бугун ижтимоий тармоқларда Қарши шаҳрининг марказий кўчаларининг бирида содир бўлган жанжал видеоси тарқалди. Мазкур видео бўйича Йўл ҳаракати хавфсизлиги бош бошқармаси маълумот берди.
Қайд этилишича, 16 сентябрь куни соат 23:00 ларда Қарши шаҳрида хизмат вазифасини бажараётган Патруль-пост хизмати ходимларига 1990 йилда туғилган фуқаро Н.А. ҳамда унинг шериклари 1995 йилда туғилган Н.А. ва 1987 йилда туғилган Х.А.лар маст ҳолатда фаол қаршилик кўрсатган.
Уларга нисбатан МЖтКнинг 183 (майда безорилик) ва 194 (Ички ишлар органлари ходимининг қонуний талабларини бажармаслик) моддалари ҳамда ЖКнинг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган.
Ҳозирда ҳуқуқбузарлар процессуал тартибда қамоққа олинган.
Эслатиб ўтамиз, аввалроқ Чироқчида профилактика инспекторининг эгнидаги хизмат кийимини йиртган фуқарога жиноят иши қўзғатилганди. Шунингдек, Қаршида тунда катта йўл ўртасида бир фуқаронинг ИИВ ходимларидан қочаётгани акс этган видео тарқалганди.
Баҳринисо Мадумарова
