Термизга БМТнинг Афғонистон учун ажратган гуманитар ёрдами етиб келди
Термизга БМТнинг Афғонистон учун гуманитар ёрдам ортилган самолёти келди. Бу ҳақда “Спутник Узбекистан” хабар берди.
Бугун маҳаллий вақт билан 11:20 да Термиз аэропортига Ил-76 самолёти қўнган. Унинг бортида биринчи зарурат буюмлари мавжуд. Термизда ташкил этилган логистика маркази орқали гуманитар ёрдам Афғонистоннинг Мозори Шариф шаҳрига жўнатилиши режалаштирилган.
13 октябрь куни БМТнинг қочқинлар масаласи бўйича Олий Комиссари Термиз орқали Афғонистонга гуманитар ёрдам етказиб берилишини маълум қилганди.
Шунингдек, 15-17 октябрь кунлари Дубайдан Афғонистон учун белгиланган гуманитар ёрдамнинг навбатдаги партияси ҳам олиб келинади. Маълумотларга кўра,октябрь ойи бошларидан буён қўшни республикага Термиздан темирйўл орқали 40 вагон озиқ-овқат етказиб берилган.
Аввалроқ Афғонистоннинг ШҲТдаги иштироки ҳақида хабар берилганди. Шунингдек, Ўзбекистон Пентагон кучларини республика ҳудудига жойлаштирмоқчи эмаслиги маълум бўлганди.
Жаҳонгир Қўзиев
