Ўзбекистон Пентагон кучларини республика ҳудудига жойлаштирмоқчи эмас — Мудофаа вазирлиги
Ўзбекистон Пентагон делегацияси ташрифи юзасидан ҳеч қандай сўров олмаган. Бу ҳақда мудофаа вазирлиги матбуот котиби Баҳром Зулфиқоров "Риа Новости"га маълум қилди.
“Бу маълумотларни тасдиқлай олмайман, чунки биз расмий ташриф ҳақида сўров олмадик. Ҳозирда расмий сўров йўқ”, – деган Зулфиқоров.
Бундан аввал АҚШ Ўзбекистонга антитеррор кучларни жойлаштиришни режа қилаётгани тўғрисида маълумот тарқалганди. Аммо кейинчалик бу ҳам Ўзбекистон Республикаси мудофаа вазирлиги томонидан рад этилди. Унга кўра, Ўзбекистон ўз ҳудудида АҚШ кучларини жойлаштирмоқчи эмас.
Аввалроқ Россия ва АҚШ армияси бош штаби раҳбарлари Хельсинкидаги учрашувда ушбу масалани муҳокама қилган. Унга кўра, Вашингтон Россиянинг Марказий Осиёдаги базаларидан фойдаланиши кўриб чиқилган. Шунингдек, Владимир Путин июнь ойида Жозеф Байден билан учрашувда шу мазмунда таклиф киритган.
