Тошкентда “Халифалик” давлатини қурмоқчи бўлган 12 нафар шахс ушланди
Бугун, 17 сентябр куни, ҳуқуқни муҳофаза қилувчи идоралар томонидан Тошкент шаҳрининг Олмазор, Учтепа, Яшнобод ва Юнусобод туманларида истиқомат қилувчи 12 нафар “Ҳизб-ут Таҳрир” диний экстремистик ташкилоти аъзоларининг жиноий фаолиятига чек қўйишга қаратилган тезкор тадбирлар ўтказилди. Тадбир давомида гумонланувчилар ушланиб, қамоққа олинди. Бу ҳақда Тошкент шаҳар ИИББ Ахборот хизмати хабар бермоқда.
Қайд этилишича, қўлга олинганларнинг барчаси Юнусобод туманида истиқомат қилувчи 1980 йилда туғилган Р.У.нинг ғоявий таъсири остида экстремистик фаолият билан шуғулланиб келган. Р.У. ва унинг жиноий алоқалари ижтимоий тармоқ орқали Украина давлатида яшириниб келаётган 1980 йилда Қирғизистон Республикасида туғилган, “Махмуд Абдулмўмин” тахаллусли — Холдаров Махмуджон Абдумаликович билан алоқа ўрнатиб, унинг маърузалари ва “Ҳизб-ут Таҳрир” экстремистик ташкилоти материалларини аҳоли орасида тарқатиб келган.
Шунингдек, унинг кўрсатмалари асосида “таҳрирчилар” сафига янги аъзоларни ёллаш билан шуғулланиб юрган. Улар Республикамизда “Халифалик” давлатини қуриш тўғрисидаги ғояларни доимий равишда тарғиб қилишган.
Ушбу шахсларнинг яшаш манзилларида ва уяли алоқа воситаларида “Ҳизб-ут Таҳрир” диний экстремистик ташкилотининг адабиётлари ва материаллари мавжудлиги аниқланиб, процессуал тартибда расмийлаштирди. Ҳозирда уларнинг ноқонуний хатти-ҳаракатларига ҳуқуқий баҳо бериш ва жавобгарликка тортиш мақсадида тергов-суриштирув тадбирлари давом эттирилмоқда.
"Ҳурматли фуқаролар! Ички ишлар вазирлиги Сизларни огоҳлантиради. “Ҳизб-ут Таҳрир” диний экстремистик ташкилоти сафида фаолият қилиш, гъояларини қоъллаб-қувватлаш, шу билан бирга “Махмуд Абдулмоъмин” тахаллуси билан ёъгърилган маъруза ва материалларни сақлаш ҳамда тарқатиш жиноий жавобгарликка тортилишга сабаб боълади. Оъзингизни ва фарзандларингизни “Ҳизб-ут Таҳрир” ва бошқа экстремистик ташкилотлар сафига қоъшилиб қолишидан асранг!" — дейилади расмий хабарда.
Эслатиб ўтамиз, аввалроқ Зангиота тумани, Жиззах вилояти, Сирдарё ва Сурхондарёда террорчилик ташкилоти аъзолари ушланганди.
Баҳринисо Мадумарова
