Oʻzbek adibi Qoʻchqor Norqobil "Moskvaning oltin qalami" ("Zolotoye pero Moskvы") 2- Xalqaro festivalida nasr yoʻnalishi boʻyicha oʻtkazilgan tanlovda birinchi oʻrinni qoʻlga kiritdi.
"Moskvaning oltin qalami" (Zolotoye pero Moskvы) 2-Xalqaro festivali 18 noyabridan 20 noyabriga qadar boʻlib oʻtdi. Loyiha onlayn oʻtkazilishiga qaramay, nafaqat yozuvchilar, balki kitobxonlar uchun ham yilning asosiy adabiy voqealaridan biriga aylandi.
Festivalning “Nasr” nominatsiyasi boʻyicha 9 nafar ishtirokchi gʻolib boʻlgan. Oʻzbek adibining "Moskvaning oltin qalami" uchun hayʼat aʼzolari tomonidan "Aktyorning sevgisi" hikoyasi alohida eʼtirof etildi.
Maʼlumot uchun, adib "Daryo ortidagi yigʻi" (1994), "Oʻn sakkizga kirmagan men bor" (2002), "Kulib tur, azizim" (2005), "Quyoshni kim uygʻotadi?" singari nasriy hamda "Xosiyatli dunyo" (1992), "Kaftimdagi qizgʻaldoq" (1993) sheʼriy toʻplamlarini yozgan.
Shuningdek, A. S. Pushkin, M. YU. Lermontov, S. Yesenin, YE. Yevtushenko kabi shoirlarning nasriy asarlarini oʻzbek tiliga tarjima qilgan.
Qoʻchqor Norqobil Rossiya Davlat Dumasi Jamoatchilik palatasi hamda Rossiya Xalqaro yozuvchilar uyushmasi tomonidan "Muqaddas Anna" ("Svyataya Anna") ordeni va boshqa koʻplab xalqaro mukofotlarga ham sazovor boʻlgan.