Avstraliyaning janubi-sharqida o‘rmon yong‘inlari maydoni kengayishda davom etmoqda. Yangi Janubiy Uelsning Xill End hududidagi o‘rmon yong‘inlari oqibatida yuzlab hayvonlar nobud bo‘ldi. Bu haqda ABC News xabar berdi.
Baterst shahri shimolidagi yong‘inda ikkita uy va beshta xo‘jalik binosi yonib ketgan, 400 qo‘y va 300 qoramol nobud bo‘lgan. Yong‘inlar maydoni 15,7 ming gektarni tashkil etdi.
Qishloq yong‘in xavfsizligi bo‘limi yaqin kunlarda, ayniqsa, Piramul va Xargreyvs hududlarida bir necha yuzta uy yong‘in xavfi ostida bo‘lishi mumkinligi haqida ogohlantirdi.
Zararni baholash guruhlari o‘rmon yong‘inlaridagi zararlarni hisoblashadi. Yong‘inni o‘chirishga 14 samolyot va 200 nafar o‘t o‘chiruvchi jalb etilgan. Tambarura va Xargreyvs hududlaridagi uylar va korxonalar elektr energiyasidan uzilgan. Qishloq yong‘in xavfsizligi xizmatining taʼkidlashicha, o‘t o‘chiruvchilar o‘nlab uylarni yong‘indan himoya qilishda katta ishlarni amalga oshirgan.
O‘t o‘chirish boshqarmasi matbuot kotibi Anjela Berfordning taʼkidlashicha, sharoit yaxshilanganiga qaramay, vaziyat hanuz xavfli, chunki «yong‘in hali ham o‘chirilgani yo‘q».
Xabar qilinishicha, alanga sharqqa, Crudine Ridge Wind Farm shamol stansiyasi tomon yoyilmoqda.
Dushanba kuni Avstraliya meteorologiya byurosi (VOM) issiq va quruq ob-havo Yangi Janubiy Uelsning sharqi va shimolida katta yong‘in xavfini keltirib chiqarishi mumkinligi haqida ogohlantirdi.
Avval xabar qilinganidek, Avstraliyadagi eng dahshatli tabiiy ofatlardan biri bo‘lgan 2019-2020 yillardagi qora yoz yong‘inlarida kamida 33 kishi va 3 milliardga yaqin hayvon va qush halok bo‘lgan.