O‘zbekiston tashqi ishlar vaziri Baxtiyor Saidov Ashxobodda Turkmaniston prezidenti Serdar Berdimuhamedov bilan uchrashdi. Bu haqda Saidov o‘zining Telegram kanalida maʼlum qildi.
“Davlatlarimiz rahbarlari o‘rtasida o‘rnatilgan yaqin va do‘stona aloqalar barcha sohalarda strategik sheriklikni rivojlantirish uchun mustahkam zamin yaratmoqda”, — deb yozadi Saidov.
Shuningdek, O‘zbekiston va Turkmaniston tashqi ishlar vazirliklari o‘rtasida siyosiy maslahatlashuvlarning navbatdagi davrasi bo‘lib o‘tdi.
“Ko‘p asrlik mushtarak tarixiy merosga tayangan holda bugun mamlakatlarimiz Markaziy Osiyoda izchil taraqqiyot, tinchlik va barqarorlikni ilgari surmoqdalar”, — deyiladi xabarda.
Taʼkidlanishicha, doimiy muloqot va almashinuvlar har tomonlama rivojlantirib borilmoqda.