Britaniyaning BBC teleradiokompaniyasi AQSH prezidenti Donald Tramp tomonidan qo‘zg‘atilgan 10 milliard dollarlik tuhmat daʼvosini bekor qilishni talab qilmoqda. Daʼvo BBC‘ning “Panorama” hujjatli filmi bilan bog‘liq.
RBS-Ukraina BBC‘ga tayanib xabar berishicha, teleradiokompaniya Florida shtati sudi ushbu ish bo‘yicha BBC‘ga nisbatan shaxsiy yurisdiksiyaga ega emasligini maʼlum qilgan. Shuningdek, sud majlisi o‘tkazilayotgan hudud noo‘rin ekani hamda Donald Tramp o‘z daʼvolarini yetarli darajada asoslab bera olmaganini taʼkidlagan.
BBC Tramp tomonidan hech qanday real zarar isbotlanmaganini qayd etadi. Kompaniya maʼlumotiga ko‘ra, hujjatli film namoyish etilganidan keyin Tramp qayta prezident etib saylangan va Florida shtatida saylovchilarning katta qismining ovozini qo‘lga kiritgan. Shu bilan birga, AQSH prezidenti “Panorama” filmi BritBox platformasida namoyish etilganini iddao qilgan, biroq BBC bu maʼlumotni asossiz deb atagan.
Shuningdek, BBC Tramp hujjatli film “haqiqiy yovuz niyat bilan tayyorlanganini” ishonchli tarzda isbotlay olmasligini bildirgan.
Avvalroq BBC montaj masalasida uzr so‘ragan, biroq moliyaviy kompensatsiya talablarini qatʼiyan rad etgan hamda tuhmat ayblovlari uchun asoslar mavjud emasligini bildirgan. Kompaniya, shuningdek, “Panorama” filmi AQSH hududida namoyish etilmaganini va Tramp shaʼniga tuhmat qilinmaganini taʼkidlagan.
2025-yil dekabr oyida Donald Tramp BBC‘ni 2024-yilgi prezidentlik saylovlaridan bir hafta oldin namoyish etilgan “Panorama” hujjatli filmi orqali tuhmat qilganlikda ayblab, sudga bergan edi.