Bugun, 20 iyun kuni “Biznesni rivojlantirish banki” ATB tashabbusi bilan “Yoshlar – kelajagimiz” jamg‘armasi hamda “Tadbirkorlar va ishbilarmonlar harakati – O‘zbekiston Liberal-demokratik partiyasi hamkorligida “Yosh tadbirkorlar” Respublika forumi o‘tkazildi. Unda yosh tadbirkorlar, yosh fermerlar, yosh startapchilar, mas’ul xodimlar va OAV vakillari ishtirok etdi.
Forum doirasida “Biznesni rivojlantirish banki” ATB huzuridagi Kichik biznesni rivojlantirish jamg‘armasi tomonidan yosh tadbirkorlar mahsulotlari va yosh startapchilarning innovasion ishlanmalari ko‘rgazmasi tashkil etildi. Ko‘rgazmada O‘zbekiston Respublikasi Prezidentining 2023 yil 14 sentyabrdagi PQ-306-sonli qarori asosida biznes loyihalari bank tomonidan moliyalashtirilgan yosh tadbirkorlar ishtirok etdi.
"Surxondaryo viloyati Qumqo‘rg‘on tumanidan keldim. Kelinlar sarpolari, sovundan yasalgan iforli gullar, taqinchoqlardan yasalgan sumkachalar kabi 10 dan ortiq turdagi mahsulot ishlab chiqaraman. Qo‘l ostimda uch nafar ishchi, 25 dan ortiq shogirtlarim bor. Biznesni rivojlantirish bankidan 100 million garovsiz kredit olib, kerakli uskunalar sotib oldim, ish joyimizni jihozlatdim. Hali qiladigan ishlarimiz ko‘p", – deydi 25 yoshli tadbirkor Nilufar Gulboyeva.
Forum yosh tadbirkorlar va yosh startapchilarni qo‘llab-quvvatlash, ular uchun muloqot platformasini yaratish, yoshlarni biznesga jalb qilish va ularning biznes loyihalarini moliyalashtirishni jadallashtirish masalalari bo‘yicha o‘zaro fikr almashish maqsadida tashkil etildi.
"Davlatimiz rahbarining qarori asosida Biznesni rivojlantirish banki kichik biznesni uzluksiz qo‘llab-quvvatlash kompleks dasturining asosiy tayanch banki sifatida belgilangan. Shundan kelib chiqib, bankimiz hamkorlar bilan birgalikda "Yosh tadbirkorlar" forumini o‘tkazish tashabbusi bilan chiqdi. Bizning maqsadimiz yoshlarning loyihalarini moliyalashtirishda faol ishtirok etish. O‘tgan vaqt mobaynida bankimiz tomonidan 2 600 nafardan ortiq yosh tadbirkorlarga 239 mlrd so‘mlik kreditlar ajratildi. Bugun forumda 28 nafar tadbirkorning mahsulotlari ko‘rgazmasi tashkil etildi. Ular bankimiz tomonidan tashkil etilgan kichik biznesga ko‘maklashish markazlarida o‘qigan, imtixon topshirib sertifikat olgan yoshlar. Biz ularni yangi-yangi loyihalarni amalga oshirishga chorlayapmiz. Zero yoshlarning biznes loyihalarini moliyalashtirishga tayyormiz",– deydi Biznesni rivojlantirish banki axborot xizmati rahbari Shuhrat Oripov.
Tadbir so‘nggida ishtirokchilar yoshlar tadbirkorligini qo‘llab-quvvatlash borasida hali foydalanilmayotgan resurslar mavjudligini bildirishib, yoshlarni biznesga faol jalb qilish bo‘yicha o‘zaro fikr almashdilar.