Buxorolik Mironshoh Rajabov oshpazlik faoliyatini boshlaganiga uncha ko‘p bo‘lmadi. Biroq kasbiga bo‘lgan mehr-muhabbat uni bu sohada yaxshi natijalarga erishishiga yordam berdi. U ayni kunlarda Xiva shahrining qadimiy “Ichan-qalʼa” majmuasida o‘tkazilayotgan Xalqaro etnosport festivalida ishtirok etmoqda. Mironshoh respublikamizning barcha viloyatlaridan kelgan oshpazlar o‘rtasida bo‘lib o‘tayotgan qadimiy oshlar chempionatida Buxoro viloyati nomidan qatnashmoqda. U mazkur festivalning qizg‘in o‘tayotganini taʼkidladi.
Mazkur musobaqada respublikamizning barcha viloyatlarida tayyorlangan qadimiy oshlar bo‘yicha bellashuvlar bo‘lib o‘tmoqda.
Maʼlum bo‘lishicha, Buxoroda ikki xil osh turi juda ham mashhur hisoblanadi. Buxorolik oshpazning aytishicha, ushbu osh turlari bir-biridan tubdan farq qiladi.
"Oshi qobili zig‘ir yog‘ida yog‘li qilib tayyorlanadi, u juda ham quvvatbaxsh hisoblanadi. Oshi sofi esa parhezbop bo‘lib, unda ishlatiladigan mahsulotlar alohida-alohida qaynatilib, yarim soatga yaqin dimlanib pishiriladi. Bizning bu oshlarimiz 2000 yillik tarixga ega", — deydi u.
Mironshohning mazkur chempionatdan asosiy maqsadi boshqa hamkasblari bilan tajriba almashish va musobaqada munosib ishtirok etish.
30 yoshli Alisher Qo‘shimov Xorazm viloyatining Yangiboz tumanidan. U, asosan, to‘ylarda osh pishiradi. U bugun o‘z tumanida mashhur bo‘lgan qadimiy oshlardan birini tayyorlamoqda.
Alisher Qo‘shimovning maʼlum qilishicha, Xorazm oshining boshqa viloyatlarda tayyorlanadigan oshlardan farqi bu unga solinadigan mahsulotlarida.
"Hozir pishirayotgan bizning bu oshimizga no‘xat va har xil ziravorlar solinmaydi. Bizning viloyatimizda ikki xil osh tayyorlanadi. Bu Qabla oshi va Suzma oshi. Hozir jamoamiz bilan Qabla oshini pishiryapmiz. Ushbu oshimiz, asosan, oila davrasida tayyorlanadi", — deydi oshpaz.
Alisher aka bu kabi osh chempionatlarida doimiy ishtirok etib keladi va shunga yarasha tajribasi ham yuqori. U bunday festivallar barcha ishtirokchilar o‘rtasida o‘zaro tajriba almashish imkonini berishini taʼkidlab, yangi-yangi do‘stlar orttirishga ham yordam beradi deya qo‘shimcha qildi.
"O‘zim Xorazm viloyatining Yangibozor tumanida faoliyat yuritaman. 2014 yildan beri osh pishirib kelaman. Asosan, to‘ylarda Suzma oshini tayyorlayman. Har bir inson o‘zining kasbidan, qilayotgan ishidan rohatlanishi kerak. Men bir kunda osh tayyorlamasdan turolmayman. Har bir o‘zbek xonadoni borki, bayram va tadbirlarni palovxonto‘rasiz tasavvur qilolmaydi. Biz ham ko‘plab oshpazlar bilan bo‘lgan suhbatimizda respublikamizning barcha hududlaridagi yurtdoshlarimiz oshni juda ham sevib isteʼmol qilishiga yana bir bor amin bo‘ldik. Suhbatlar vaqtida maʼlum bo‘ldiki, xorazmliklar o‘z uyida haftada ikki bor osh tayyorlashadi. Bu payshanba va yakshanba kunlaridir. Payshanba kuni ulug‘ juma kuniga tayyorgarlik ko‘rish va bu kunni shukronalik ila kutib olish maqsadida har bir xonadonda osh qilinadi. Yakshanba dam olish kunini ham xorazmliklar palovsiz tasavvur etolmaydi", — dedi u.
Inomiddin Fozilov Andijon viloyatidan. U bugungi chempionatdan katta maqsadlarni ko‘zlagan. Oshpazimiz Xalqaro etnosport festivali haqida gapirar ekan, o‘zining hayajonlarini bosa olmadi. Uning ayticha, bu musobaqalar tarixni yod etish, qadimiy anʼanalarimizni saqlab qolish va kelajak avlodga ham ularni yetkazish imkonini beradi. Andijonlik oshpazimiz bugungi festival ishtirokchilari uchun devzira guruchidan Andijoncha osh tayyorlamoqda.
Andijonda osh, asosan, qo‘y yog‘i va go‘shtidan qilinadi. Bizda qaysi turdagi guruchdan tayyorlanishiga qarab osh turlari farqlanadi. Viloyatimizda devzira guruchdan qilinadigan osh mashhur hisoblanadi. Mazkur guruch turi ham aynan bizning hududlarda yetishtiriladi. U faqat Andijon iqlimiga moslashgan.
Inomiddin Fozilovning maʼlum qilicha, Andijon viloyatida eng ko‘p choyxona osh tayyorlanadi.
Har bir o‘zbek xonadoni borki, bayram va tadbirlarni palovxonto‘rasiz tasavvur qilolmaydi. Biz ham ko‘plab oshpazlar bilan bo‘lgan suhbatimizda respublikamizning barcha hududlaridagi yurtdoshlarimiz oshni juda ham sevib isteʼmol qilishiga yana bir bor amin bo‘ldik. Suhbatlar vaqtida maʼlum bo‘ldiki, xorazmliklar o‘z uyida haftada ikki bor osh tayyorlashadi. Bu payshanba va yakshanba kunlaridir. Payshanba kuni ulug‘ juma kuniga tayyorgarlik ko‘rish va bu kunni shukronalik ila kutib olish maqsadida har bir xonadonda osh qilinadi. Yakshanba dam olish kunini ham xorazmliklar palovsiz tasavvur etolmaydi.
Maʼlum qilinishicha, chempionatning g‘olib va sovrindorlari Oshpazlar uyushmasining tanlovi asosida aniqlanadi.