Prezident Shavkat Mirziyoyev Respublika shoshilinch tibbiy yordam ilmiy markazining Sirdaryo viloyat filialiga bordi.
Bu yerda ikki kun oldin Guliston shahridagi umumiy ovqatlanish shoxobchalaridan birida gaz balloni portlashi oqibatida jarohat olganlar davolanmoqda.
Markaz rahbariyati va shifokorlar Prezidentimizga bemorlarning ahvoli va davolash jarayonlarining borishi haqida axborot berdi. Davlatimiz rahbari baxtsiz voqeada turli darajada tan jarohati olgan fuqarolar davolanayotgan palatalarga kirib, ulardan xabar oldi, oila aʼzolari bilan suhbatlashdi.
Prezidentimiz mutasaddilarga jabrlanganlarga zarur barcha tibbiy yordam koʻrsatilishini qatʼiy nazoratga olish boʻyicha topshiriq berdi. Baxtsiz hodisa oqibatida qurbon boʻlganlarning oila aʼzolariga hamdardlik bildirib, ularga moddiy yordam koʻrsatish zarurligini qayd etdi.
Uch kun muddatda qurbon bo‘lganlarning oilasiga 100 million so‘mdan moddiy yordam ajratish topshirildi.
Topshiriqqa ko‘ra, Respublika shoshilinch tibbiy yordam markazi direktori boshchiligida 10 nafar malakali shifokorlar brigadasi jabr ko‘rganlarga bepul sifatli tibbiy va psixologik yordam ko‘rsatmoqda.
Masʼullar oldiga sodir boʻlgan voqeaning sabablarini puxta oʻrganish, qonun ustuvorligini taʼminlash, kelgusida bunday holatlarning oldini olish va yongʻin xavfsizligi ustidan nazorat ishlarini kuchaytirish vazifasi qoʻyildi.