Rimdan Germaniyaga uchayotgan Ryanair aviakompaniyasining samolyoti ikki kun kechikdi. Bunga sabab – bortga yashirincha kirib olgan mushuk bo‘ldi.
Parvozdan oldin ekipaj a’zolari samolyotning oldingi qismidan mushukning ovozini eshitib qolishgan. Xodimlar uni elektrotexnika bo‘limida topishgan, biroq mushukni ushlashning iloji bo‘lmagan. U simlar orasiga yashirinib, har qanday harakatdan qochgan.
Muhandislar bir nechta panellarni yechib tashlashga majbur bo‘lishgan, ammo mushuk baribir qo‘lga tushmagan. Oradan ikki kun o‘tib, u o‘zi chiqib ketgan va shundan keyin samolyot Germaniyaga parvozni amalga oshirgan.