2023-yil 1-apreldan boshlab, O‘zbekistonda davlat bog‘chalari ko‘p qavatli uylarda tashkil etilishi mumkin. Bu haqda joriy yilgi Davlat dasturi loyihasida maʼlum qilingan.
Mazkur loyihaga asosan, maktabgacha taʼlimdagi qamrov darajasini hozirgi 67 foizdan kamida 80 foizga yetkazish rejalashtirilgan.
Masalan, bitta 150 o‘rinli davlat bog‘chasini yaratish uchun o‘rtacha 6 mlrd so‘m mablag‘ talab etiladi. Bundan tashqari, yangi bog‘chani qurish uchun yer masalasi og‘irligicha qolmoqda. Shu bilan birga, bitta 3 xonali kvartirada 25 nafar bola uchun bog‘cha tashkil etish mumkin. 150 nafar bola uchun 6 ta kvartirani xarid qilish va jihozlashga o‘rtacha 4 mlrd so‘m talab etiladi.
Bundan tashqari, davlat-xususiy sheriklik loyihasi doirasida ijaraga berilgan yer uchastkasida nodavlat MTT binosini qurgan xususiy sherikka ushbu binoni mazkur loyiha uchun bank kreditlari bo‘yicha garovga qo‘yishga oid cheklovlar bekor qilinadi.
1 600 ta oilaviy MTTlarini tashkil etish hisobiga 40 mingdan ortiq bolalar o‘rni yaratiladi. Buning uchun byudjetdan 185 mlrd so‘m jalb etiladi.
Natijada, maktabgacha taʼlim bilan qamrovni oshirishda xizmat qilayotgan va zarur moliyaviy resurslarga muhtoj bo‘lgan 594 ta tadbirkorga qo‘shimcha imkoniyat yaratiladi.