Kinematografiya agentligi buyurtmasiga binoan “Yoshlik” kinostudiyasi DUK tomonidan “Osmondagi qiz” murakkab postanovkali badiiy film tasvirga olinishi kutilmoqda.
Ushbu filmda poytaxtimizdagi "Tashkent city" majmuasining qurilishi va unda ishtirok etayotgan minorali kran operatori Nargizaning hayoti haqida hikoya qilinadi.
Poytaxtliklar va poytaxt mehmonlarining ko‘pchiligi "Tashkent City"ning katta taassurot uyg‘otadigan bu qurilishiga qarab, bunchalik ulkan loyihani amalga oshirish naqadar qiyin ekan haqida o‘ylab ko‘rmagan bo‘lsa kerak. Mislsiz vazifalar va katta mehnat talab etadigan bu maskanda tashabbuskor yoshlar, g‘ayratli va mehnatsevar mutaxassislarning fidoyi mehnati mujassam. Film qurilish ishtirokchilarining matonatini namoyon etib, tomoshabinlarga "Tashkent City"ning asl mahobatini to‘liq his etishga yordam beradi.
Film postanovachi rejissyori Anvar Madraimov, ssenariy mualliflari Adil Koptan va Yan Milenin, badiiy rahbar Rashid Malikov. Shuningdek, film yurtimizda ayollar ham barcha sohada katta muvaffaqiyatlarga erishishi mumkinligini ko‘rsatib beradi.
