Jizzax shahrining “Do‘stlik” mahalla fuqarolar yig‘inida istiqomat qiluvchi shaxs Ichki ishlar organlariga murojaat qilib, unga tegishli bank plastik kartasidan nomaʼlum shaxs 8 million so‘m pullarini yechib olganini bildirgan. Bu haqda viloyat IIB xabar berdi.
Mazkur holat yuzasidan jinoyat ishi qo‘zg‘atilib, olib borilgan tezkor qidiruv tadbirlari davomida mazkur jinoyat jabrlanuvchi mijoz bo‘lgan bankning chakana xizmatlar bo‘limi boshlig‘i, Jizzax shahrining “Uchariq” mahallasida istiqomat qiluvchi shaxs tomonidan sodir etilgani aniqlandi.
Shuningdek, ayblanuvchi yana 10 nafar fuqaroning pulini o‘margan. Jabrlanuvchilarga jami 133 million 629 ming so‘m zarar yetkazilgan.
Hozirda holat yuzasidan tergov harakatlari olib borilmoqda.